多名市民誤墮港版Fear Factor天仙局

【本報獨家消息】本報接獲熱心市民來電，聲稱發現新蒲崗的食肆《和味館》里日前有多人聚集，秘密部署參加港版Fear Factor【港譯：誰敢來挑戰】的策略。為更深入了解事件真相，本報特派記者叉燒飯 親到現場採訪。

來自廟街的華弟一邊熟練地替龍虱揻殼，一邊眉飛色舞地說：「唔好同我爭，記得留番龍虱俾我，即係和味龍吖，蟲入面佢至甘香鮮味架喇，攞黎送酒一流啦。蛋白質豐富，好補架。阿叔今晚瞓房定瞓廳睇晒佢啦！Sssssu, 我啜。」

來自旺角的卡門：「妖，唔制吖，人地成日要返夜，記住留番蜂蛹俾我呀。炸到佢色澤金黃，外脆內嫩就最好架喇，貪佢蛋白高脂肪低兼夾可以平衡荷爾蒙嘛。」說畢即彈了彈手中的香煙，然後徐徐地吐出一縷輕飄的煙霧。

來自花墟既大塊田：「竹蟲等我黎喇。係就係韌D，但係大大隻，好好‘唧’，又有‘浸’竹既清香，留係D牙罅度，諗起都盞呀！食到興起我直情要用手嗱。聽大陸D電台節目講，隻野重有10多種人體所需既氨基酸添呀。聽我講，‘食竹蟲，冇捉蟲！’」說罷即鬼祟地把剛挖出來的鼻屎搓在鄰座花花的褲襠上。

來自藍田既花花，流著兩行鼻涕地說：「呢排忙考試，成日要捱夜讀書，老媽子教落，禾，禾，禾蟲就最有營養㗎喇，有蛋白質啦，鐵質啦，磷質同維他命B等等。媽，媽，媽咪通常都係鉢仔焗或者生炒過我食既。生，生，生食就未試過囉，不過五顏六色揸住黎食，應該都幾好味同得意啩。」

來自遠方台灣的Chi Ling嬌滴滴地說：「我好喜歡蘆葦蟲的喲。蛋白質和脂肪都很高，很有美容潤膚效果的哦。咪咪？！好壞的，吃蟲又扯到人家的咪咪，欺負我，不給她們休息一下。」說的在座的一眾男士都朣孔放大，爭相去搶碟上剩下的龍虱。

「嗱，大嗱嗱幾十雞，贏左記得要一齊分返架。」「得喇，長氣，記得係鏡頭前要扮到好驚噉樣呀！」「下次記得試埋蠶蛹同沙蟲呀。」「喂，呢邊望鏡頭老友，擺個成‘炸’禾蟲擺落口既甫士吖唔該。」「Chi Ling小，小，小姐，其實我好崇拜你。遲D可唔可一齊上，上，上電視。」眾人一邊興高采烈地談論參賽的戰略，一邊十分「警訊」地把所有個人資料（包括銀行戶口的資料）填上參賽表格，然後交給場內一名綽號「糕給景屍」的中國籍男子。

＊＊＊＊＊＊＊＊

事後，為了核實事件的真確性，本報多番致電NBC電視台詢問。終在今晨截稿前獲得NBC亞太區總裁柏金遜先生透過電郵作出書面回覆：「眾所週知，Fear Factor是一個瘋魔全球的真實節目，今年己在歐美推出第五輯。本台確曾積極地與數間本台電視台商討過；亦曾聘請過顧問公司研究過拍攝港版Fear Factor的可行性，希望港人可以在後董時代去更真實地感受這個引人入勝的真實節目。但顧問報告卻指出拍攝港版Fear Factor在執行上將會遇上一個結構性的難題。那就是礙於廣東人‘乜都夠膽食’的習性，在歐美各地最有收視保證的‘生吞蛇蟲鼠蟻’環節在本地將變得亳無吸引力，間接拖垮整個節目的收視，所以計畫最後胎死腹中。本台現鄭重聲明，我們是從未在香港招募參賽者。對於有市民不幸被不法份子利用，誤墮報名黨的圈套，本台深表遺憾，呼籲當事人盡快報警尋求協助。」